තාත්තී හැපි ෆාදර්ස් ඩේ!

පාන්දර කෝල් එක..

මෙල්බන් ලොකු එකී..

ඊලගට ටී ටීක් මැසෙජ් එක.. 

ඉතාලියෙ පොඩි එකා..

කප් රුකෙන් කේක් ගෙඩියක් එවයි මද්දුමී..

පූසො උබවත් හිටින් මගෙ හිතට හරි මදී..

රැහැයියන් ගයන ගී.. 

දෙල් ගහට මුවා වී..

රැයද දහවල කියා.. 

වෙනස උන් නොමදනී..

තනි මටත් ඒකෙ දැන්..

එහෙව් ගානක් නැතී..

අවුරුද්ද මහ පෝය.. 

ඔහේ ගෙවිලා ගියා..

හාමිනාගේ දානෙ..

පන්සලට ගෙන ගියා..

පාරෙ යන මොටෝ රත..

නිතර හිත රැවටුවා..

ඉගිල ගිය මතකයන්..

නෙත් කෙවෙනි තෙත් කලා..

~~~ © විරංග ගුණසේකර ~~~

පින්තූර අන්තර්ජාලයෙනි..

~~~අයිතිය~~~

~~~~   අයිතිය  ~~~~

දුට්ඨගාමිණී අභය

නුඹ නම් ගියා තුසිතෙට

මා හට නිවී සැනසෙන්නට 

තිබූ රන් තෙලඹු ගස

පවා මට අහිමි කර…

එදා සිත හදාගෙන 

ගියා දුර පලාතට

බොහෝ සිත් නිවාලන

මහා සෑයට

පුදා මා බිම් කඩ…

එදාසිට බොහෝ දින

ගෙවුනි එක එක විලාසෙට

එහෙත් නොවරදවාම 

සෑම පුරසඳ නිශාවට

මමත් පිදුවෙමි මහා සෑ රද…

නුදුරු බක් මහා පෝයට

මම ගියා සුපුරුදු ලෙස

පැදකුණු කරන්නට 

මගේ මහ සෑ රද

නෙලූ කඩුපුල් මල්ද දෝතින් ගෙන…

ක්ශීර වර්ණෙන් සදා

සදෙව් ලොවටත් පෙනෙන ලෙසිනා

වැජඹුනු සෑ රජිඳා

නොදුටුවෙමි මම එදා

සුපුරුදු දෙසින් පෙනෙනා…

සැනකෙලි සිරින් ඉසිරී

නොයෙක් පෙලහර දුටිමී

විදුලි එලියෙන් කණ වුනී

මන් මුලා වූ බවක් දැනුනී

මගේ සෑ රද එතන නොවුනී…

නෙලූ මල් අතින් ගිලිහී

නෙතේ කඳුලැලි කඩා වැටුනී

මහා බැතියෙන් පිදූ සෑ රද

වෙළඳ දැන්වීමක් ලෙස

දවස් කුලියට යොදා තිබුනී…

ගාමිණී අභය, නුඹම පමණයි සාක්ෂිය

මා නුඹට පැවරූ

ඒ බිමේ අයිතිය 

විකිණිය නොහැකි බව

සිල්ලර කාසියට..........

©  විරංග ගුණසේකර ~~~~~~~~

පින්තූර අන්තර්ජාලයෙනි..   05/05/19

——————————————————————————————————————————